ဧရာဝတီ

ပုဂ္ဂလိကသို့ မကြာသေးမီက လုပ်ကိုင်ခွင့် ပေးလိုက်သည့် နိုင်ငံတ၀န်းလုံးရှိ စက်သုံးဆီ အရောင်းဆိုင်များတွင် ဆီဈေးနှုန်းများ မြင့်တက်သွားသည်ဟု သိရသည်။

အစိုးရ အရောင်းဆိုင်များတွင် ဒီဇယ် တဂါလန် ကျပ် ၃၀၀၀ ခန့်၊  ပုဂ္ဂလိက ဆိုင်များတွင် ကျပ် ၃၃၀၀ နှင့် ၃၅၀၀ ကြားတွင် ရောင်းချနေကြောင်း ရန်ကုန်မှ စက်သုံးဆီ ရောင်းချသူ တဦးက ပြောသည်။

“ပုဂ္ဂလိက ကျတော့ တဆိုင်နဲ့ တဆိုင် အမြတ် ယူကြတာ မတူဘူး၊ အခုချိန်အထိတော့ စီးပွားရေးသမားတွေကို ဈေးညှိနှိုင်းပြီး ရောင်းဖို့ မပြောတော့ သူတို့လည်း ရောင်းချင်သလို ရောင်းတာပေါ့”ဟု သူက ပြောသည်။

စွမ်းအင် ၀န်ကြီးဌာနက စက်သုံးဆီ အရောင်းဆိုင်၂၄၆ ခုကို ပုဂ္ဂလိကပိုင် ပြုလုပ်လိုက်ရာ ထိုဆိုင်များကို ကုမ္ပဏီအစုအဖွဲ့၂၀ ကျော် လုပ်ကိုင်ခွင့် ရရှိထားကြောင်း သိရှိရသည်။

ဈေးနှုန်း တည်ငြိမ်မှန်ကန်ရေးအတွက် ဆောင်ရွက်ရန် အာဏာပိုင်တို့တွင် တာဝန်ရှိသည်ဟု ဒီဇယ်ဆီ တင်သွင်းသူ လုပ်ငန်း ရှင် တဦးက ပြောသည်။

“အာဏာပိုင်တွေက သူတို့ တာဝန်ယူထားတဲ့ လုပ်ငန်းတွေကို စနစ်တကျ လုပ်နိုင်ဖို့ လုပ်ငန်းရှင်တွေကို လွှဲပြောင်းပေးတယ် ဆိုပေမယ့် အခုအချိန်မှာမှ ဈေးတွေ ထပ်တက်လာတာကတော့ သူတို့အနေနဲ့ ပြန်စဉ်းစားသင့်တယ်”ဟု သူက ပြောသည်။

ပုဂ္ဂလိကပိုင် လွှဲပြောင်းပေးလိုက်ခြင်းသည် ဓာတ်ဆီ၊ ဒီဇယ်ဆီ အပါအ၀င် စက်သုံးဆီ ဈေးကွက်ကို လွတ်လပ်စွာ လုပ်ကိုင်ခွင့် ပေးလိုက်သည့် ခြေလှမ်း ဖြစ်သည်ဟု အာဏာပိုင်တို့က ပြောဆိုကြောင်း စီးပွားရေးနှင့် ကူးသန်း ရောင်းဝယ်ရေး ၀န်ကြီးဌာနမှ အရာရှိတဦးက ပြောသည်။

“စက်သုံးဆီ တင်သွင်း ဖြန့်ချိတဲ့ အသင်းကို ဖွဲ့ထားပြီး ပြည်တွင်းက တင်ပို့ ရောင်းချလို့ရတဲ့ ငွေနဲ့ စက်သုံးဆီတွေကို ပြန်ဝယ်ရ မယ်၊ ကုန်သွယ်ရေး ၀န်ကြီးဌာနရဲ့ခွင့်ပြုချက်၊ စီးပွား ကူးသန်းက သတ်မှတ်ထားတဲ့ စံနှုန်းတွေ အတိုင်း သွင်းရမယ်ဆိုတဲ့  ကန့်သတ်ချက်တွေလည်း ရှိနေတယ်”ဟု ထိုအရာရှိက ပြောသည်။

လွတ်လပ်စွာ ရောင်းချခွင့် ရှိသော်လည်း တင်သွင်းခွင့် အပြည့်အ၀ မရှိပါက စက်သုံးဆီ မလုံလောက်သည့် ပြဿနာများ ရှိလာနိုင်ကြောင်း သူကပြောသည်။

အာဏာပိုင်တို့က လုပ်ငန်းရှင်တို့ကို အဝေးပြေးလမ်းမများတွင်လည်း စက်သုံးဆီ အရောင်းဆိုင်များ ဖွင့်လှစ်ကြရန်  တိုက်တွန်းထားကြောင်း သိရသည်။

< Prev		Next >